पत्रकारांसाठी वर्षातून दोन वेळा विशेष आरोग्य शिबिरांचे आयोजन - मंत्री प्रकाश आबिटकर
मुंबई : राज्यातील पत्रकारांना कॅशलेस आरोग्य सेवा उपलब्ध करून देण्यासाठी राज्य शासनाने विशेष समिती स्थापन करण्याचे निर्देश दिले आहेत. ही समिती महात्मा फुले जन आरोग्य योजना, केंद्र शासनाच्या आरोग्य योजना तसेच मध्यप्रदेश सरकारच्या पत्रकारांसाठीच्या कॅशलेस आरोग्य योजनेचा अभ्यास करून सर्वसमावेशक प्रस्ताव शासनास सादर करणार आहे.
ही दिशा वैद्यकीय शिक्षण मंत्री हसन मुश्रीफ यांनी मंत्रालयात झालेल्या बैठकीत दिली. त्याचबरोबर सार्वजनिक आरोग्य व कुटुंब कल्याण मंत्री प्रकाश आबिटकर यांनी पत्रकारांसाठी वर्षातून दोन वेळा विशेष आरोग्य शिबिरे आयोजित करण्याचे निर्देश दिले.
समितीची रचना व जबाबदारी
या समितीत आरोग्य सेवा आयुक्त, महात्मा फुले जन आरोग्य योजनेचे राज्य समन्वयक, माहिती व जनसंपर्क महासंचालनालयाचे प्रतिनिधी, तसेच पत्रकार संघटनांचे प्रतिनिधी यांचा समावेश असणार आहे. समितीने राज्यातील विद्यमान आरोग्य योजनांचा तसेच केंद्र शासनाच्या योजनांचा तुलनात्मक अभ्यास करून पत्रकारांसाठी कॅशलेस आरोग्य सेवा देण्याचा व्यवहार्य व समावेशक आराखडा तयार करावा, असे मंत्री मुश्रीफ यांनी सांगितले. या प्रस्तावात ‘सीएसआर’ निधीचा वापर, तसेच मोठ्या शहरांतील पत्रकारांना तात्काळ आरोग्यसेवा कशी मिळू शकेल यावर विशेष लक्ष केंद्रित करण्याचेही निर्देश त्यांनी दिले.
महिला पत्रकारांसाठी विशेष आरोग्य शिबिर
सार्वजनिक आरोग्य मंत्री प्रकाश आबिटकर यांनी सांगितले की, पत्रकारांच्या आरोग्य तपासणी शिबिरांसोबतच महिला पत्रकारांसाठी स्वतंत्र व विशेष शिबिरे आयोजित करण्यात यावीत. महात्मा फुले जन आरोग्य योजना ही पत्रकारांनाही लागू आहे; त्यामुळे त्या योजनेचे कार्ड पत्रकारांना वाटप करण्यात यावे, असेही त्यांनी स्पष्ट केले. तसेच, शंकरराव चव्हाण पत्रकार सन्मान निधी योजना आणखी व्यापक करण्यासाठी माहिती व जनसंपर्क महासंचालनालयाने प्रस्ताव सादर करावा, असे निर्देश त्यांनी दिले.
या बैठकीस सार्वजनिक आरोग्य विभागाचे सचिव निपुण विनायक, वैद्यकीय शिक्षण विभागाचे सचिव धीरज कुमार, आरोग्य सेवा आयुक्त कादंबरी बलकवडे, वैद्यकीय शिक्षण आयुक्त डॉ. अनिल भंडारी, माहिती व जनसंपर्क महासंचालनालयाचे संचालक (वृत्त व जनसंपर्क) किशोर गांगुर्डे, मुख्यमंत्री वैद्यकीय सहायता निधी कक्षाचे प्रमुख रामेश्वर नाईक, राज्य अधिस्वीकृती समिती अध्यक्ष यदु जोशी, मंत्रालय व विधिमंडळ वार्ताहर संघाचे अध्यक्ष दिलीप सपाटे, मराठी पत्रकार परिषदेचे विश्वस्त किरण नाईक, मुंबई विभागीय अधिस्वीकृती समिती अध्यक्ष दीपक कैतके, राज्य अधिस्वीकृती समिती सदस्य विनोद जगदाळे, नेहा पुरव, संजय मलमे, संजय पितळे आणि जयेश सामंत उपस्थित होते.
