.jpeg)
नवी दिल्ली : २०२४ च्या राज्यसभा निवडणुकीत भाजप आणि काँग्रेसमध्ये रंजक लढत पाहायला मिळू शकते. भाजपने अनेक राज्यांत जास्त उमेदवार उभे करून विरोधकांसाठी ही लढत अवघड बनवली आहे. भाजपने आपल्या सर्व उमेदवारांची यादी जाहीर केली आहे. या यादीत नव्या चेहऱ्यांना संधी देण्यात आली आहे. २८ पैकी २४ नवीन चेहरे आहेत.
महाराष्ट्रातील सत्ताधारी आघाडीने राज्यसभा निवडणुकीत चौथा उमेदवार उभा करण्याचा निर्णय घेतला आहे. याचा अर्थ चव्हाण आणि काँग्रेसचे माजी मंत्री चंद्रकांत हंडोरे यांच्यासह रिंगणात असलेले सर्व सहा उमेदवार या महिन्याच्या अखेरीस संसदेच्या वरिष्ठ सभागृहात बिनविरोध निवडून येण्याची शक्यता वर्तविण्यात येत आहे.
चव्हाण, माजी आमदार मेधा कुलकर्णी आणि संघ परिवाराचे कार्यकर्ते अजित गोपचडे यांना भाजपने उमेदवारी दिली आहे. मुख्यमंत्री एकनाथ शिंदे यांच्या नेतृत्वाखालील शिवसेनेने माजी केंद्रीय मंत्री मिलिंद देवरा यांची, तर उपमुख्यमंत्री अजित पवार यांच्या राष्ट्रवादी काँग्रेसने (राष्ट्रवादी) विद्यमान राज्यसभेचे खासदार आणि माजी केंद्रीय मंत्री प्रफुल्ल पटेल यांना उमेदवारी दिली आहे.
राज्यसभेतून महाराष्ट्रातील सहा नेत्यांपैकी कोणालाच पुन्हा संधी देण्यात आलेली नाही त्यामुळे केंद्रीय मंत्री नारायण राणे आणि व्ही. मुरलीधरन, माजी केंद्रीय मंत्री प्रकाश जावडेकर (तिघेही भाजपचे), शिवसेनेचे अनिल देसाई (उद्धव बाळासाहेब ठाकरे), ज्येष्ठ पत्रकार कुमार केतकर (काँग्रेस), आणि शरद पवार यांच्या वंदना चव्हाण हे बाहेर पडणार आहेत. तर शिवसेना (UBT) आणि शरद पवार पक्षामध्ये फूट पडल्यामुळे त्यांना आपले उमेदवार निवडून आणणे कठीण होणार आहे.
भाजपने ज्या चार खासदारांना पुन्हा उमेदवारी दिली आहे त्यात राष्ट्रीय अध्यक्ष जेपी नड्डा, केंद्रीय मंत्री एल मुरुगन, केंद्रीय मंत्री अश्विनी वैष्णव आणि भाजपचे प्रवक्ते सुधांशू त्रिवेदी यांचा समावेश आहे. भाजपने यापूर्वीच मोठ्या नेत्यांना राज्यसभेऐवजी लोकसभेत उतरवणार असल्याचे स्पष्ट केले आहे. आता केंद्रीय मंत्री मनसुख मांडविया, नारायण राणे, धर्मेंद्र प्रधान, भूपेंद्र यादव, पियुष गोयल या ज्येष्ठ नेत्यांना लोकसभा निवडणुकीत उतरवण्याची तयारी सुरू आहे.